Col 4 | GbrGAW | STEP | Ofye afyenu adagayi, fye zhin ofye afyenu ɓo cewo, fye pa n fyehin ge fye n Dagayi lolo n eshemi n wo kafye wyelo.

Colossians 4

1 Ofye afyenu adagayi, fye zhin ofye afyenu ɓo cewo, fye pa n fyehin ge fye n Dagayi lolo n eshemi n wo kafye wyelo.

2 Ato ɓe fye n na aduwa zhin yin, fye pmi Shekwoyi amsa, fya pa fya zhin wo godiya esa n ɓa ɓe n cei. 3 Fye to ze amwi, fye zhin yi aduwa ntu yi ɓo n na ɓai Shekwoyi wa gayi aba n yi ɓa zhin Nabari manayi Kristi nya waʼazin n mi dna n Kurkuku n tu kwo ɓo nyi. 4 Fye zhin aduwa, n mi ɓa zhin waʼazi n bugba kalayi, n nu-nuyi n jesun, ma wu kwo pei-pei shi kwo kunce ma zhin.

5 Fye zhin apma n esa yi n fya bwa vinya, fya gna aza nabari manayi, fye la ce, shi fye daɓo n ɓai n wu. 6 Fye fa efye azata ɓa ze a manayi n tukwoyi gyi, n na ɓai fya bwa amsa manayi n fye ɓa ga aza.

Gnaɓi

7 Tikikus eyi zado ye-yei, wo ɓa gnafye shi mi wulo, wo zhin oza nu n wo zhin tnu-tnu n kalayi, woi zhin Dagayi tnu-tnu n gnisun n mi yi. 8 Mi tnu n woi n na bai wa gye she fye wu, wa fumi bugba wa gami bugba kala njesun. 9 Mi tnu n Onisimus yi, eyi za ye-yei ɓemanayi zhinyi, oza nfye mi, owo n Tikikus yi ɓa ga fye nabari vinya.

10 Aristarkus, n wo gnisun n miyi n ya nyi wo dnalo n kurkuku, wo tnu fye n wo gnaɓiyi n Markus yi Barnaba, zhalu shi ma gnafye nyi fye gwo Markus n na agmadayi n wa ɓe fye aba. 11 Yesu Yustus wo tnu fye lo nwo gna ɓiyi a deye zhin a Yahudiyi a Yesu-viyi nu, n ɓa kunsun lo n miyi, ɓai fumi bugba.

12 Abafras, n wo gmi n fye ayi nyi, Yesu Kristi fyenu, wo tnu fye n wo gnaɓiyi, wo zhin aduwa cici ntu fye ɓo, woi nya Shekwoyi wa ga fye kala, wa bma fye zhin fya kpe wo nufi ye n sai vinya n na aɓo vinya n fye ɓa zhin. 13 Mi gnafye ɓehin-hin, woku tnu-tnu zhin fye n mwa n wo aduwa yi, n na a Yesuviyi n ɓafi n Lawudikiya n Hiyarabokis nyi.

14 Likita Luka wo tnu fye n wo gnaɓi yi, n Dimas yi.

15 Fye ɓi a Yesu-viyi gna n ɓa fi n Lawudikiya nyi, n Nimfas yi n na azai n ɓa ye zhi n wo puwa nyi. 16 Sanu n fya wasikaye ɓa, fya tnu n kwoi n Lawudikiya. Efyehin fya ba wasika n ma ka gaɓa nyi. 17 Fya gna Arkibbus, “La tabata lalle ho zhin oɓo lo n Dagayi wa gnaho ge ho zhin.”

18 Emi gnaɓi nyi n mi rubutu yi n ma ka. Fye pami ɓo dna ya n kurkuku, Shekwoyi anabarka ɓa shekna fye, Amin.